يارفيقة دربي الحب مل الانتظار
الأمل يبني جدر والزمن يهدم جدر
التظاهر بالقساوة مثل رد أعتبار
للقلوب اللي ملتها ساكاكين الغدر
ليت لي قلبين لو كان فيها مستعار
والا لي وجهين لو واحد منها ودر
ياقصيدة من قصايد سعد والا نزار
عاد انا ماهوب يصلح لي الا ماندر
انتي أطهر ذنب وأجمل غلط واشجع قرار
حطك الله في ليال العمر ليلة قدر
الهزيمة في عيونك بطعم الأنتصار
من يقاوم سحر عينك ورمشك لاخدر
الشعور اللي يجيني بصالات المطار
كنت اخافة بس ماكنت اعرف انه قدر
والنهايات الكبيرة من أخلاق الكبار
يلبس المحتاج فيها ثياب المقتدر
مادريت انك مسحتي دموعي بالخمار
لين قالت رعشة ايديك يامجنون ادر
السنين اللي معك عشتها جنه و نار
علقيها في رقبتك ترى دمي هدر
والبسيني مثل مايلبس الليل النهار
واشرقي بي واغربي بي على شمس وبدر
وادفنيني في بياض نشع فيه الحمار
عاشقٍ فارق حياتة على مفرق صدر
قولي انه مات فيني على شكل اعتذار
حاول وحاول وحاول يعيش ولاقدر
