شكرا على الكلمه الحلوه
اللي بتتقال فتغير مودنا
شكرا للناس اللي فارق
جدا في حياتها وجودنا
شكرا على النية الصافية
و لناس بوعودها وافية
دايما في الشده وجودهم
بيهونلنا اصعب محنه
شكرا على اجمل ضحكه
و لكل الناس السالكه
اللي على العشرة بتبقى
بهديلهم ميت مليون ورده
شكرا على رد الغيبه
و القلب المليان طيبه
و الشكر لكل حبيبه
واقفه في ضهر حبيبها و سانده
شكرا على حب الخير
للغير من غير اي نفسيه
و لأي نصيحه من القلب
للقلب في وقتها جايه
و اصحاب ملهاش في مصالح
مهما زعلت بتسامح
و قلوب بأقل قليل حامده
و شاكره و كمان مرضيه
شكرا للي مشرفنا و اللي
عمره في يوم ما خذلنا
و اللي في الضهر تملي
في افراحنا و قبلها احزاننا
و الناس الشايلة همومنا
و اللي قابلين بعيوبنا
و اللي جابرين خواطرنا
بجد الدنيا دي بيهم جنه