مدري أزعل منك أو أزعل عليك
خذها مني قبل ما اروح وتروح
كثر ما فيني من الإحساس فيك
بس مدري ليه ما نقدر نبوح
أشتكيلي منك واشكيني إليك
وما أبي مني ومنك إلا الوضوح
إيه أبي قلبك وأبي قربك وأبيك
لا تخلّيني على احلامي أنوح
ألف بسم الله وما شاء الله عليك
من عيون الناس يا الوجه السموح
كل ورده ذايبه في وجنتيك
ما تفوح وعطر أنفاسك يفوح
احتويني قلب روحي تحتويك
عاشقك طبعه مثل طبعك جموح
أنتهي في كل ليلة وأبتديك
والوفا بصدورنا يبني صروح
أنت مالك في وسط قلبي شريك
لا تخلّيني جسد من دون روح
من غلاتك صرت انافس والديك
وارتفع بمواصلك سقف الطموح
من متى وانا على حطة يديك
يا مفصلني على قد الجروح
ما يروح إلا الذي ودك يجيك
وما يجيك إلا الذي ودك يروح
