من ردى الحظ قلبي طول الأيام خايف
خايف والليالي ماتجي له بكيفه
ماتجي له بكيفه مثل ماكان شايف
كيف الأيام جاله بالحياه الكسيفه
الحياه الكسيفه والعنا والكلايف
عقب عزه تعرقل بالظروف الكليفه
الظروف الكليفه والدموع الذرايف
والسهر والترجي بعد فرقا وليفه
بعد فرقا وليفه مالقا له ولايف
غيم الجو وأظلم بالهموم العنيفه
الهموم العنيفه بالضلوع النحايف
خلّت القلب يرجف بالضلوع النحيفه
بالضلوع النحيفه عقب يأس وحسايف
وش تفيد الحسايف والقدر حط سيفه
القدر حط سيفه دون زين الوصايف
حال من دون شوفه مابقى غير طيفه
مابقى غير طيفه داخل القلب طايف
طيف زين الوصايف والخدود النظيفه
الخدود النظيفه والثمان الرهايف
يوم جيته وجاني بالعباة الرهيفه
العباة الرهيفه فوق ذيك الردايف
واعنا قلبي اللي ما اهتنى في مصيفه
