من يشبهك يالفـارقـة عن كل زين
وإنت اللي حسنك بالمفيد المختصر
نـوعـه كثـر ما نـادر و راقي و ثميـن
ممكن تـراه العين مره في العـمـر
من يشبهك يا هند أو من تشبهين
لـو كل تــشبـيـه في مثلك يـفتـخـر
إن قلت ياشمس أو قمر في الحالتين
يا حي فيك الشمس ويا حي القمر
من رقـتـك يا هند والطبع الرزين
سحر الخجل زادك مع الهيبة سفر
في طلتك هاللي كثر ما فيها ليـن
كنك من الضي إنخلقتـي والزهـر
ملامحـك فتـنـة وكلما تـضحكيـن
في مبسمك حول البرد يضوي جمر
وعيناك ما مـر الشعر شرواها عين
قصيدتين أبلغ من أوصاف الشعر
ولو تسألين الناس أنا أشباهي وين
بتجاوبك يا هند ما مثـلك بـشر
ومن يشبهك لو هو سؤال بكلمتين
ما لك شبه هذا الجواب المختصر
